Në një pritje të ngrohtë të mbajtur sot në Rektoratin e Universitetit të Prishtinës, prof. dr. Arta Basha-Jakupi, prorektore për ndërkombëtarizim dhe shkëmbim akademik, së bashku me profesorin Arsim Ejupi dhe zyrtarë nga Zyra për Marrëdhënie me Jashtë, priti profesorët dhe studentët nga Universiteti Charles në Republikën Çeke.

Në kuadër të vizitës nga Universiteti Charles ishin profesorët Josef Novotny, Martin Lepic, Jiri Hasman dhe 20 studentë nga ky universitet.

Në mirëseardhjen e profesorëve dhe studentëve, prorektorja Basha-Jakupi vlerësoi vizitën e tyre në Universitetin e Prishtinës dhe mundësitë e bashkëpunimit të ardhshëm me Universitetin Charles në kuadër të ndërkombëtarizimit të Universitetit të Prishtinës. Prorektorja nënvizoi rëndësinë e dimensionit ndërkombëtar, duke theksuar se studentë dhe profesorë të shumtë nga Kosova kanë ndjekur mundësitë e arsimimit jashtë vendit, duke pasuruar peizazhin akademik të universitetit.

Prorektorja Basha-Jakupi theksoi edhe programet e shumta në gjuhën angleze që ofrohen në Universitetin e Prishtinës, si semestrat e shkëmbimit dhe Universiteti Veror i Prishtinës, vazhdojnë të sjellin studentë nga e gjithë bota.

Profesorët e Universitetit të Charles shprehën interesimin e tyre për të vizituar Kosovën, veçanërisht Universitetin e Prishtinës, bazuar në aspekte të ndryshme gjeografike, historike dhe kulturore që përcakton këtë rajon.

Gjatë vizitës së tyre, studentët nga Universiteti Charles në Republikën Çeke ndanë përvojat e tyre në Kosovë, duke vlerësuar ngrohtësinë e popullit të saj dhe pasurinë e kulturës së saj.

Në përfundim, prorektorja Basha-Jakupi theksoi përkushtimin e Universitetit të Prishtinës për nxitjen e bashkëpunimit ndërkombëtar dhe mundësinë për bashkëpunim në të ardhmen me Universitetin Charles në Republikën Çeke.