Universiteti i Prishtinës ka kënaqësinë të njoftojë për vizitën e ambasadorit të Turqisë në Kosovë, z. Sabri Tunç Angılı në ambientet e UP-së. Kjo vizitë shënon një moment të rëndësishëm të bashkëpunimit ndërmjet UP-së dhe institucioneve të arsimit të lartë në Turqi.

Në kuadër të vizitës, ambasadori Angılı u takua me rektorin, Qerim Qerimi dhe prorektoren, Arta Basha Jakupi. Diskutimi u përqendrua rreth nxitjes së nismave bashkëpunuese ndërmjet UP-së dhe institucioneve të njohura të arsimit të lartë në Turqi, njëkohësisht, forcimit të bashkëpunimeve ekzistuese akademike.

Rektori Qerimi dhe ambasadori Angılı kanë shprehur interes të përbashkët për promovimin e shkëmbimeve akademike, projekteve të përbashkëta kërkimore, universitetit veror të UP-së dhe programeve të mobilitetit të studentëve. Këto përpjekje synojnë të promovojnë mirëkuptimin kulturor dhe të krijojnë mundësi të reja për studentët dhe studiuesit nga të dy vendet.

Universiteti i Prishtinës dhe Ambasada e Turqisë në Kosovë theksuan rëndësinë e kësaj vizite si nismë për rritjen e bashkëpunimit ndërmjet komunitetit akademik të të dyja vendeve, duke ndihmuar në krijimin e mundësive të reja për zhvillim akademik dhe shkëmbim kulturor.