Universiteti i Prishtinës ka bërë edhe një hap të rëndësishëm drejt ndërkombëtarizimit dhe ngritjes së kredibilitetit shkencor.

Herbariumi i Fakultetit të Shkencave Matematike-Natyrore të Universitetit të Prishtinës është vendosur në Indeksin ndërkombëtar të Herbariumeve - Index Herbariorum në Nju Jork, SHBA.

Me këtë indeksim ndërkombëtar, Herbariumi i Universitetit tonë do të jetë i barasvlefshëm me herbariumet e njohura shkencore të botës dhe tash e tutje do të njihet me akronimin „UPH" - University of Prishtina Herbarium.

Për të arritur këtë indeksim, shefi i Herbariumit, prof. dr. Elez Krasniqi dhe asst. dr. Naim Berisha nga Departamenti i Biologjisë (FShMN) kanë kryer një punë të madhe dhe intensive për përgatitjen, sistematizimin dhe dokumentimin e materialeve botanike, duke plotësuar të gjitha kriteret dhe standardet ndërkombëtare të kërkuara.

Ky sukses është një kontribut i rëndësishëm për komunitetin shkencor në Kosovë që i hap rrugë bashkëpunimeve dhe njohjes më të gjerë ndërkombëtare të kërkimeve botanike që realizohen në vendin tonë.

Herbariumi i Universitetit të Prishtinës pritet të zhvendoset këtë vit në hapësirat e ndërtesës së re të Fakultetit të Shkencave Matematike-Natyrore.