Universiteti i Prishtinës arriti memorandum bashkëpunimi me Fondacionin „Bonevet”.

Memorandumi u nënshkrua nga rektori Arben Hajrullahu dhe drejtorja menaxhuese e Fondacionit „Bonevet”, Flatra Thaqi, ndërsa e pranishme në ngjarjen e shënuar ishte edhe prorektorja për ndërkombëtarizim dhe shkëmbim akademik, Rozafa Basha.

Me memorandum parashihet përzgjedhja nga Universiteti i Prishtinës i studentëve me performancë të lartë, të cilët do të përgatiten më mirë për tregun e punës në sistemin arsimor të Kosovës, duke qenë pjesë e programit të Praktikës profesionale në „Bonevet”.

Me anë të bashkëpunimit, synohet, gjithashtu, përmirësimi i cilësisë së arsimit në Kosovë, pjesëmarrja e përfaqësuesve të Fondacionit „Bonevet” në aktivitetet e Universitetit të Prishtinës dhe e studentëve të UP-së në seminaret dhe trajnimet e këtij fondacioni.

Universiteti dhe Fondacioni do ta krijojnë edhe një sistem të promovimit të përbashkët të ngjarjeve, aktiviteteve dhe rezultateve.

„Bonevet”, një institucion edukimi që inkurajon fëmijët, të rinjtë dhe të rriturit të identifikojnë talentet dhe të zhvillojnë aftësitë, tashmë ka nisur bashkëpunimin me Fakultetin e Edukimit të Universitetit të Prishtinës.