Një memorandum mirëkuptimi është nënshkruar sot mes Universitetit të Prishtinës dhe Fondacionit „Jahjaga”, për dobinë e dyanshme dhe të mirën e përgjithshme.

Memorandumi u nënshkrua nga rektori i Universitetit të Prishtinës, Arben Hajrullahu dhe presidentja Atifete Jahjaga, themeluese dhe udhëheqëse e Fondacionit „Jahjaga”.

Duke uruar që gjithçka të ecën mbarë, presidentja Jahjaga memorandumin e nënshkruar e vlerësoi bazë të mirë për bashkëpunim konkret, ndërsa rektori Hajrullahu deklaroi se nga ky bashkim forcash do të bëhen punë të mira.

Me memorandum synohen nisma të përbashkëta në fushën e edukimit, kërkimit shkencor dhe zhvillimit profesional të studentëve dhe personelit akademik, me qëllimin që të përmirësohet cilësia e arsimit në Kosovë.

Një pikë e veçantë dhe domethënëse e memorandumit është edhe organizimi i vizitave të vazhdueshme të studentëve të Universitetit të Prishtinës në ambientet e Muzeut „Çast” të Fondacionit „Jahjaga”, që u kushtohet të mbijetuarve të dhunës seksuale gjatë luftës në Kosovë.

Rektori Hajrullahu gjatë takimit dhe nënshkrimit të memorandumit u shoqërua nga prorektorët Rozafa Basha e Avni Hajdari, ndërkaq nga Fondacioni „Jahjaga” në Rektoratin e UP-së erdhën edhe Egzona Bexheti, drejtoresha ekzekutive e këtij fondacioni dhe Bleona Hajdari, këshilltare e presidentes së parë grua të Kosovës.

Presidentja Jahjaga i dhuroi rektorit Hajrullahu një punim filigrani të bërë nga duart e të mbijetuarave të dhunës seksuale gjatë luftës, bashkë me disa numra të revistës së Fondacionit, të titulluar „Za”, ndërsa mori dhuratë plaketën e Universitetit të Prishtinës.