Prorektorja për ndërkombëtarizim dhe shkëmbim akademik, Rozafa Basha, në takimin vjetor, të organizuar nga Këshilli Britanik, u angazhua që Universiteti i Prishtinës të shtojë miqtë e tij dhe bashkëpunimet.

Takimi i përvitshëm „Going Global Partnerships Programme: Deep Dialogues 3 – Transnational Education: A Deeper Insight into TNE Regulatory and Policy Environments” u zhvillua në Mançester të Mbretërisë së Bashkuar dhe zgjati dy ditë.  

Kjo ngjarje e profilit të lartë mblodhi politikëbërës, rregullatorë dhe liderë të arsimit të lartë nga mbi 20 vende për të eksploruar rolin kritik të politikave publike në arsimin transnacional (TNE). 

Diskutimet u fokusuan në praktikat aktuale rregullatore, sfidat dhe zgjidhjet për përparimin e bashkëpunimit ndërkombëtar në arsimin e lartë.  

Pjesëmarrja e profesoreshës Basha nënvizoi përkushtimin e Universitetit të Prishtinës për të fuqizuar partneritetet ndërkombëtare, për të përmirësuar kuadrin rregullator dhe për të adresuar pengesat ndaj ndërkombëtarizimit të arsimit të lartë. 

Takimi vjetor ofroi njohuri të vlefshme dhe mundësi për rrjetëzim, duke kontribuuar në vizionin e universitetit për zgjerimin e bashkëpunimeve akademike dhe hartimin e politikave të qëndrueshme për arsimin transnacional.  

Ky forum është pjesë e përpjekjeve të Këshillit Britanik për të promovuar shkëmbimin e njohurive dhe bashkëpunimin në arsimin global, duke synuar krijimin e një komuniteti aktiv praktik dhe nxjerrjen e rekomandimeve të zbatueshme për avancimin e arsimit ndërkombëtar.