Prorektorja për ndërkombëtarizim dhe shkëmbim akademik, Arta Basha Jakupi, priti një delegacion nga Departamenti i Akreditimit dhe Marrëdhënieve Ndërkombëtare të Austrisë.
Dr. Maria Weber, drejtoreshë e Departamentit të Akreditimit/ Marrëdhënieve Ndërkombëtare në AQ Austria dhe Barbara Schinwald, Departamenti i Akreditimit në AQ Austria, kryesuan delegacionin, të cilit iu bashkuan Naim Gashi, drejtor i përgjithshëm i Agjencisë së Kosovës për Akreditim dhe Arianit Krasniqi, koordinator për projektin e binjakëzimit me AQ Austria.
Në fjalën hyrëse, prorektorja Basha Jakupi theksoi rëndësinë e ndërkombëtarizimit të Universitetit të Prishtinës dhe zhvillimin e më shumë programeve ndërkombëtare, të cilat janë veçanërisht të rëndësishme në përparimin e universitetit në kurse dhe programe në gjuhë të tjera, siç është anglishtja. Në këtë qasje, Universiteti i Prishtinës do të synojë të marrë pjesë në sa më shumë Programe të Përbashkëta duke nënshkruar memorandum mirëkuptimi me universitete nga e gjithë bota. Duke qenë se i përmbahen të njëjtave standarde evropiane, këto projekte bashkëpunuese kanë një ndikim të rëndësishëm.
Duke pasur parasysh se prorektorja Basha Jakupi ka ekspertizë në menaxhimin dhe vlerësimin e cilësisë dhe procedurave në institucionet e arsimit të lartë dhe e angazhuar si eksperte e jashtme ndërkombëtare për vlerësimin e institucioneve të arsimit të lartë të agjencive të ndryshme të akreditimit të BE-së, e informoi delegacionin austriak për Universitetin e Prishtinës, funksionin e tij dhe marrëdhëniet pozitive me Agjencinë e Kosovës për Akreditim, përafrimin me universitetet evropiane në aspektin e cilësisë së arsimit dhe shkallën në të cilën proceset kombëtare të akreditimit mund të plotësojnë kërkesat për pajtueshmëri me standardet evropiane.
Ndërkohë, Dr. Maria Weber, Drejtoreshë e Akreditimit dhe Marrëdhënieve Ndërkombëtare në AQ Austria, informoi mbi sistemet e arsimit universitar dhe pasuniversitar austriak, si dhe funksionimin e universiteteve publike, private dhe private-private. Në këtë diskutim, delegacioni austriak ngriti një temë të këndshme: Programin e Përbashkët Evropian me universitetet austriake, veçanërisht me Universitetin e Salzburgut në Austri, me të cilin Universiteti i Prishtinës do të negocionte në fazën e ardhshme.
Në fund, delegacionit austriak iu dha një pasqyrë e shkurtër e Universitetit të Prishtinës, fakulteteve dhe programeve të tij, bashkëpunimit ndërkombëtar dhe Universitetit Veror Ndërkombëtar të Universitetit të Prishtinës, i cili sjell studentë nga e gjithë bota në Prishtinë.