Të nderuar kolegë,

Të nderuar profesionistë të administratës,

Zonja dhe zotërinj,

Sot jemi mbledhur këtu në Universitetin e Prishtinës për të festuar një ditë me rëndësi të madhe: Ditën e Adminstratës. 

Si rektor i këtij institucioni, është nder dhe privilegj t'ju drejtohem të gjithëve në këtë rast të veçantë. Dita e Administratës është një ditë që botërisht shënohet për të njohur punën dhe nderuar profesionistët e fushës së administratës; ata të cilët punojnë pa lodhur prapa skenave për të siguruar mbarëvajtjen dhe funksionimin e çdo institucioni dhe, në këtërast, të institucionit tonë të dashur.

Pozicioni juaj përbën shtyllën e institucionit tonë, duke ofruar mbështetje thelbësore për stafin tonë akademik, për menaxhmentin dhe për studentët. Puna juaj mund të duket shpesh se kalon pa u vënë re, por është zelli, përkushtimi dhe pasioni juaj për punën që na mundësojnë ne të tjerëve të kryejmë detyrat tona në mënyrë efektive dhe të përmbushim misionin tonë.

Ndërsa festojmë këtë ditë, le të marrim një moment për të reflektuar për kontributet e rëndësishme të dhëna nga profesionistët tanë të administratës, nga ju dhe të tjerët para jush. Me punën tuaj, ju e bëni të mundur që institucioni ynë, jo vetëm të funksionojë, por edhe të funksionojë në mënyrë efektive, duke menaxhuar dhe kryer detyra të cilat sigurojnë saktësi dhe cilësi të shërbimeve, duke ofruar këshilla profesionale, duke siguruar që informacioni i saktë të ndahet por po ashtu të ruhet konfidencialiteti i tij.

Misioni i punës tuaj shtrihet përtej atyre që mund tëkonceptohen si detyra të thjeshta administrative. Ju jeni pamja dhe pasqyra e institucionit tonë, që përmes shërbimit dhe profesionalizmit tuaj siguroni që ta bëni universitetin tonë një institucion mikpritës, respektues dhe të harmonishëm.

Sot, ne jemi së bashku për të shprehur mirënjohjen tonë më të thellë për ju dhe në të vërtetë për të gjithë kolegët e administratës, dhe për t’ju thënë se përpjekjet e palodhura dhe përkushtimi i palëkundur i secilit prej jush ka luajtur rol integral në suksesin e Universitetit të Prishtinës dhe se këto përpjekje dhe ky përkushtim janë qendrore për realizimin e misionit të tij të fisëm arsimor, kërkimor dhe inovativ. Prandaj, dëshiroj të shpreh vlerësimin tim më të përzemërt për të gjithë profesionistët e administratës, që punojnë me zell për të mbështetur misionin dhe vizionin tonë. 

Në këtë Ditë të Administratës, ne ju nderojmë juve dhe kontributet tuaja të çmueshme për institucionin tonë. Ne festojmë arritjet, zellin dhe angazhimin tuaj për përsosmëri. 

Faleminderit shumë për gjithçka që bëni, dhe ju uroj që të vazhdoni të shkëlqeni në punën e juaj.

Gëzuar Ditën e Administratës!