Në renditjen për vitin 2025 të Times Higher Education (THE), platformës më prestigjioze globale të rangimit të institucioneve të arsimit të lartë, Universiteti i Prishtinës në raport me vitin 2024, shënoi ngritjen më të madhe prej 66 për qind në fushën e cilësisë së kërkimit shkencor.

Universiteti i Prishtinës, i vetmi nga institucionet publike e private gjithëshqiptare të arsimit të lartë, i përfshirë që nga viti 2023 në mesin e 2000 universiteteve të 115 vendeve në botë që përbëjnë renditjen e përgjithshme të Times Higher Education (THE), shënoi ngritje edhe në tre tregues tjerë me të cilët matet klasifikimi ndërkombëtar i universiteteve.

UP-ja shkoi më lart për 9.35 për qind në fushën e mjedisit kërkimor. Edhe kriteri i industrisë në Universitetin e Prishtinës ishte më i lartë për 9.24 për qind. Gjithashtu, cilësia e mësimdhënies u ngrit për 7.63 për qind, gjithnjë në krahasim me vitin e kaluar.

Nga gjashtë fushat e studimeve të përfshira në matjet e platformës së njohur, më së miri në Universitetin e Prishtinës u pozicionua edukimi, në vendin 601+, derisa biznesi dhe ekonomia u vlerësuan në pozitën 801+.

Times Higher Education (THE), platforma më e njohur globale e renditjes së universiteteve, bën dy rangime të ndryshme të institucioneve të arsimit të lartë nga mbarë bota.

Njëri është rangimi i përgjithshëm i universiteteve që mat e vlerëson performancën e plotë të këtyre institucioneve: kërkimin shkencor, mësimdhënien e citimin, ndërsa tjetri është rangimi në bazë të ndikimit, ku vlerësohet arritja nga universitetet e objektivave të zhvillimit të qëndrueshëm të përcaktuar nga Organizata e Kombeve të Bashkuara.

Në kohën kur mijëra maturantë të hapësirave gjeografike shqiptare në Ballkanin Perëndimor po kalojnë ditët e tyre të fundit si nxënës të shkollave të mesme, Universiteti i Prishtinës po konfirmohet ndërkombëtarisht si zgjidhja më e mirë e tyre për fillim dhe vazhdim të jetës akademike.