Në Ditën e Studentëve që për herë të parë festohet më 1 tetor, prorektori për Kërkime Shkencore, Projekte dhe Inovacion Avni Hajdari i konsideroi studentët ,,motorin kryesor të suksesit dhe shtetndërtimit”. 

Kjo ditë u organizua nga Parlamenti Studentor dhe Universiteti i Prishtinës, ndërsa prorektori Hajdari më tutje kujtoi të kaluarën plot sfida e sakrifica të këtij institucioni. 

,,Universiteti i Prishtinës, edhe pse me një histori relativisht të shkurtër, mbart mbi supe një të kaluar të pasur dhe të lavdishme. Ka qenë gjithmonë promotor i ngjarjeve të rëndësishme që kanë udhëhequr zhvillimet në Kosovë”, tha Hajdari. 

Vetë dita që u kushtohet studentëve, ndodhi në përvjetorin e protestës studentore të 1 tetorit 1997. 

Njëzet e shtatë vjet më parë studentët e atëhershëm të UP-së nën drejtimin e Unionit të Pavarur, ish-rektorit Ejup Statovci dhe profesorëve, të veshur me të bardha marshuan në protestën për kthim në objektet shkollore nga të cilat ishin larguar me dhunë. 

Protesta u shpërnda me forcë nga policia e ish-regjimit serb, por u pa që atëherë si ngjarje që lëvizi proceset drejt çlirimit përfundimtar të vendit. 

Në Ditën e Studentëve u nderuan me mirënjohje anëtarët e Këshillit të Protestave të ’97-ës, ndërsa fjalim mbajti Mihane Salihu-Bala, aktiviste e asaj kohe. 

Për studentët e sotëm dhe të dikurshëm folën edhe Arsim Ademi, zëvendësministri i Arsimit, kryetarja e Parlamentit Studentor Blerta Zeqiraj dhe ish-kryetari Edon Nishori. 

Dita e Studentëve më parë organizohej më 23 prill.