Universiteti i Prishtinës ka nënshkruar "Deklaratën e Prishtinës", një iniciativë e re që përfaqëson angazhimin për zgjerimin e rrjetit të bashkëpunimit ndërkombëtar me universitete dhe institucione nga e gjithë bota. Kjo nismë e re, e filluar nga bashkëpunimi me TUM Campus Heilbronn, përfshin një numër partnerësh të tjerë ndërkombëtarë dhe synon të thellojë shkëmbimin akademik dhe profesional.

Në ceremoninë e nënshkrimit morën pjesë rektori prof. Qerim Qerimi, prorektorja për ndërkombëtarizim, prof. Arta Basha-Jakupi, dhe ekipi nga Zyra për Marrëdhënie me Jashtë, përfshirë drejtoreshën Lumnije Bajrami. 

Nga ana e delegacionit të TUM ishin të pranishëm Daniel A. Gottschald, drejtor menaxhues i TUM Campus Heilbronn dhe Katja Kastrati.
Rektori Qerimi deklaroi: “Deklarata e Prishtinës është një testament për të krijuar një komunitet global të dijes, ku universitetet dhe sektori privat bashkëpunojnë për të përmirësuar cilësinë e arsimit.”

Një nga iniciativat kryesore që do të zhvillohet është "Erasmus Coffee", një platformë e re për dialog dhe shkëmbim akademik ndërkombëtar, që filloi me Universitetin e Prishtinës dhe pritet të zgjerohet në shumë universitete partnere.

Kjo iniciativë e re është një hap i rëndësishëm për avancimin e ndërkombëtarizimit dhe për forcimin e lidhjeve akademike në nivel global.