Universiteti i Prishtinës do të marrë grante për tetë projekte të fushave të ndryshme nga Programi i Granteve për Mbështetje të Universiteteve (USGP), i financuar nga Ambasada e ShBA-së dhe i zbatuar e mbikëqyrur nga Kosovo United States Alumni (KUSA).
Në projektet e fituara janë përfshirë disa nga njësitë akademike të Universitetit të Prishtinës, ndërsa grantet amerikane do të përmirësojnë mësimdhënien, kërkimin shkencor dhe lidhjen e studimeve me tregun e punës.
Kështu, në Fakultetin e Arkitekturës pritet të funksionalizohet Qendra për Inovacion, Laborator dhe Teknologji (CILT), që ka për qëllim inovacionin, mësim praktik dhe bashkëpunimin ndërdisiplinor. Me anë të këtyre granteve, në Fakultetin e Inxhinierisë së Ndërtimit synohet fuqizimi i kërkimeve shkencore duke zbatuar inteligjencën artificiale, teknologjitë e avancuara të informacionit dhe printimin 3D.
Në Fakultetin Ekonomik do të krijohet një bazë e të dhënave ekonomike, sociale e strukturore që do të ndihmojë hulumtuesit shkencorë në Kosovë dhe vendimmarrjen në nivel shtetëror. Gjithashtu, në këtë fakultet, një projekt tjetër nëpërmjet anketave do të hulumtojë përdorimin e inteligjencës artificiale te studentët e profesorët, në mënyrë që më pas të hartohet një udhëzues praktik për integrimin e kësaj inteligjence në arsimin e lartë.
Ruajtjes së biodiversitetit dhe faunës së Kosovës do t’i ndihmohet edhe me një projekt të krijimit të një laboratori për kodim gjenetik, në Fakultetin e Shkencave Matematike Natyrore.
Në Fakultetin e Inxhinierisë Mekanike do të krijohet Qendra e Dizajnit për Prodhim Shtresor që do të bëjë mbulimin e boshllëqeve në këtë fushë të prodhimit dhe lidhjen me industrinë. Ky prodhim nënkupton krijimin e objekteve të caktuara tredimensionale nga modele digjitale, duke lidhur mes vete disa shtresa të materialeve.
Me këto grante dhe projekte, inovacioni do të fuqizohet edhe në Fakultetin e Edukimit Fizik dhe Sportit, derisa në Fakultetin e Filozofisë nëpërmjet laboratorit dhe softverëve, dëshirohet të përmirësohen aftësitë praktike të studentëve për analizën dhe metodat e kërkimit.
Profesorët-bartës të tetë projekteve të fituara nga Universiteti i Prishtinës që do të financohen nga Programi i Granteve për Mbështetje të Universiteteve (USGP) janë: Albulena Shala, Arta Basha-Jakupi, Artan Krasniqi, Faton Tishukaj, Gentrit Berisha, Halil Ibrahimi, Riad Ramadani e Valon Veseli.
Kosovo United States Alumni (KUSA), që do të kujdeset për zbatimin e projekteve, është themeluar në vitin 2007 me ndihmën e Ambasadës së SHBA-së në Kosovë nga të gjithë ata individë që kanë marrë bursa studimi prej shtetit amerikan.