Në kuadër të programit kulturor të Prishtina International Summer University (PISU), studentët pjesëmarrës zhvilluan një ekskursion dyditor në disa nga vendet më të rëndësishme historike, kulturore dhe natyrore të Kosovës.

Gjatë ditës së gjashtë, studentët vizituan Kompleksin Memorial “Adem Jashari” në Prekaz, ku u njohën më afër me historinë e familjes Jashari, sakrificën për lirinë e Kosovës dhe rëndësinë e këtij vendi në kujtesën kolektive të vendit. Vizita vazhdoi në Prizren, ku pjesëmarrësit patën mundësinë të eksplorojnë trashëgiminë kulturore, historike dhe arkitekturore të njërit prej qyteteve më të vjetra dhe më të veçanta të Kosovës.

Programi kulturor vazhdoi edhe në ditën e shtatë, me vizita në Parkun Arkeologjik të Ulpianës, Ujëvarën e Drinit të Bardhë dhe qytetin e Pejës. Në Ulpianë, studentët u njohën me gjurmët e qytetërimit antik dhe rëndësinë historike të këtij lokaliteti, ndërsa në Ujëvarën e Drinit të Bardhë shijuan një nga atraksionet më të bukura natyrore të Kosovës. Vizita në Pejë e plotësoi itinerarin me njohjen e historisë, traditave dhe trashëgimisë kulturore të këtij qyteti.

Studentët ndërkombëtarë dhe vendorë e vlerësuan ekskursionin si një përvojë të veçantë, që u ndihmoi të kuptojnë më mirë historinë, kulturën, identitetin dhe bukuritë natyrore të Kosovës.

Përmes këtyre vizitave, PISU vazhdon të ofrojë jo vetëm një përvojë akademike, por edhe një hapësirë të rëndësishme të shkëmbimit kulturor, duke i afruar studentët me Kosovën përtej sallave të mësimit.