Universiteti i Prishtinës dhe Instituti i Krimeve të Kryera Gjatë Luftës në Kosovë nënshkruan një memorandum bashkëpunimi në një përpjekje për të ndihmuar zbardhjen e krimeve dhe ballafaqimin me të kaluarën.

Memorandumin e bashkëpunimit e nënshkruan rektori Arben Hajrullahu në emër të Universitetit të Prishtinës dhe Atdhe Hetemi, drejtori ekzekutiv i Institutit të Krimeve të Kryera Gjatë Luftës në Kosovë. 

Memorandumi parashikon zhvillimin e projekteve kërkimore, organizimin e konferencave dhe seminareve, si dhe burime dhe ekspertizë të dyanshme për aktivitete të përbashkëta.

Në memorandum janë paraparë organizime të shumta që lidhen me edukimin për historinë dhe dëmet e luftës, por edhe synohet partneritet edhe me organizata tjera rajonale e ndërkombëtare.

Rektori Arben Hajrullahu tha se gjatë bashkëpunimit, të përfshirët nga të dy institucionet do të mësojnë shumë nga njëri-tjetri, ndërsa drejtori ekzekutiv Atdhe Hetemi tregoi se që kur e ka marrë detyrën ka menduar që instituti së pari duhet të përfitojë nga ekspertiza vendase. 

Instituti i Krimeve të Kryera Gjatë Luftës në Kosovë deri tash ka mbledhur 8500 orë incizime dhe 6700 fotografi që dokumentojnë krimet e kryera në vitet e luftës.